浙江嘉年華開幕 林鄭著旗袍同鄉

【明報專訊】籍貫浙江嘅政務司長林鄭月娥，噚日出席維園「美麗浙江．欣賞香港」嘉年華開幕禮，對住台下一班同鄉，林鄭發言時特別有興致，話香港向來係移民城市，內地唔同省市嘅人移居香港，促進香港蓬勃發展同多元文化。佢又同鄉開心，話自己身上旗袍嘅絲其實都係來自浙江，隨即換嚟一片掌聲。


嘉年華由「香港浙江省同鄉會聯合會」舉辦，噚日開幕禮仲有教育局長吳克儉、中聯辦副主任林武同浙江省委副書記王輝忠等出席。林鄭演講後留低欣賞雜技、魔術同京劇演出，之後參觀攤位。唔知係咪同鄉盛情難卻，林鄭差唔多每個檔位都行勻，最終喺會場逗留咗兩個鐘先離開。


呢個為期3日嘅免費活動，設工藝美術、美食同表演等6個主題展區，入場市民除咗可以免費試食浙江湯圓同小食，仲可以觀賞傳統手工藝表演同石雕工藝品。