劉夢熊獄中寫信 談行李門 「泛民比建制『戰友』更尊重人」

【明報專訊】一向好多金句嘅全國政協前委員劉夢熊，上月因為妨礙司法公正被判囚18個月，但鐵窗生涯無阻佢繼續關心政事。劉夢熊近月同好友「東亞民情研究社」總幹事陳景聖書信來往，陳景聖噚日以研究社名義搞研討會時，就向傳媒展示3封劉夢熊喺獄中撰寫嘅信，金句唔少。


劉夢熊喺3月初寫第一封信，形容「還是泛民這些昔日對手，較之建制派『戰友』更尊重人的生命、價值、尊嚴」。何解呢？原來佢話民主黨何俊仁、單仲偕，公民黨梁家傑同社民連梁國雄都有探過佢監，又話自古「憂國憂民多遺恨」，自己見慣風浪，俯仰無愧。


稱曾有獄友大叫「尖啤好嘢」

劉夢熊3月中再寫信，聲稱「我這次的冤獄，百分之百是CY（特首梁振英）恩將仇報造成」，並引用中國前領導人鄧小平嘅故事，形容鄧小平「後來不是第三次復出如日中天嗎？」，睇嚟對自己重出江湖充滿信心。


政壇失意，但劉夢熊獄中似乎不乏支持者，話曾經有班獄友向佢大叫「尖啤（劉夢熊花名），好嘢！」，可見「人心向背」喎。


CY近日涉及「行李門」，劉夢熊喺獄中都緊貼時事，4月中就寫信批評呢件事「鬧得滿城風雨，聲名狼藉，決非偶然」，又批評對方以鬥爭哲學取代「一國兩制」嘅包容，梁振英管治對香港「是禍不是福」，下場只會係「借問瘟君欲何往？紙船明燭照天燒」，即係人間再無CY容身之地咁話。