新思維擬推4立選名單 不選港島

【明報專訊】各大小政黨正為9月立法會選舉摩拳擦掌，新思維噚日同傳媒茶敘，總幹事陳家偉（左）透露新思維最多會派4張地區直選名單，除咗港島外每區都或會有一張名單，秘書長黃俊瑯（右）有意落戶九龍東，不過喺2月新界東補選慘敗嘅黨友黃成智，就應該唔會再披甲上陣。至於盛傳會出選嘅主席狄志遠呢？陳家偉就賣關子，話黨內好多人想佢選，但最終係咪選，就要等黨內報名今日截止後先可以再透露喇。


雖然新思維倡議行「第三條路」，不過年僅20幾歲嘅黃俊瑯初生之犢不畏虎，話希望中央同港府就回歸以嚟嘅不足「認錯」，就算唔認錯都要檢討，又形容新思維對中央嘅態度，會比同樣走中間路線嘅民主思路更強硬。佢話，新思維嚟緊會以香港前途問題做選舉議題，但就係透過改善一國兩制，而非自決或港獨咁話。