工聯會勞動節酒會 標時積金對冲 嫻姐再向CY追數

【明報專訊】噚晚工聯會慶祝勞動節酒會，特首梁振英（CY）都有到場，唔知佢係咪因為怕記者問關於「行李風波」嘅事，又怕聽到工聯會榮譽會長陳婉嫻向佢「追數」，問佢關於標準工時同取消強積金對冲嘅事，所以一祝完酒，CY就急急腳咁走。但工聯會理事長吳秋北都有講番好話，佢話雖然經濟唔好，打工仔會好擔心，但有信心政府一定會迎難以上。


不過唔好以為走得快嫻姐就唔可以當面向CY追數，酒會後嫻姐同Emily講，噚晚一見到CY，就立即提出標準工時同取消強積金對冲嘅訴求，梁振英只係「哦」咗兩聲，嫻姐話明明佢參選時政綱有講，唔可以唔記得㗎，一定會繼續追問。


吳秋北：信政府可迎難而上

吳秋北就好識做，致辭時話雖然今年有「旺角暴亂」同「港獨」嘅聲音分裂社會，打工仔對前景都無乜信心，但就相信政府可以迎難而上，聽到CY不知幾開心。佢又話工聯會會員人數已衝破40萬，呼籲會員記住登記做選民，喺9月立法會選舉時投票。