學縮細「自我」 鄧厚江走出抑鬱

【明報專訊】喺警隊服務34年嘅前監管處長鄧厚江接受警隊刊物《警聲》（圖）訪問時透露，佢喺2013年退休，至2015年初突然覺得自己無以前咁重要，搞到成個人好落寞，仲患上抑鬱症。好彩佢經過藥物治療、搵朋友傾吓偈後，開始學習縮細「自我」，唔要求擔當大角色，仲重拾玩風帆等興趣，而患病經歷令佢更加珍惜親友。


鄧厚江話，事發時開始失眠，最嚴重時每晚瞓得兩個鐘，胃口大減，起初佢好難接受患病，但無放棄，接受幾個月藥物治療同搵朋友傾偈之後，學習到唔要求擔當大角色，又認為一件事嘅重要性，可以唔係大事，而係有意義嘅事。


呢段期間佢仲重拾玩風帆、鋼琴等興趣，喺網上學《道德經》、《易經》，佢提醒大家退休前要有足夠心理準備，寄語大家遇到問題時可以換個角度諗，「山不轉路轉，路不轉人轉，人不轉心轉」。