廚餘變紗線 蟹殼素製衣 慳水染布術 港紡織發明奪3國際金獎

【明報專訊】回收廚餘再做成堆肥相信大家都唔陌生，但將廚餘處理後變成著得上身嘅衫，大家又有無想像過呢？香港紡織及成衣研發中心月中喺瑞士日內瓦國際發明展，一舉奪得3個金獎，其中一項發明就以特殊細菌將高糖分廚餘天然發酵，經處理後變成紗線，所以大家如果將食剩嘅蛋糕麵包回收，將來隨時可以變時裝。


日內瓦發明展 環保慳成本

呢款「廚餘紗線」係由研發中心同城大共同發明，先將高糖分廚餘發酵，獲得乳酸，再將乳酸凝成膠粒、噴紗，最後製成紗線。研發中心行政總裁葛儀文話，廚餘紗線嘅好處係做到廢物利用，100克廚餘大約可再造10克紗線，製作過程約3日，天然發酵亦令製作過程耗用嘅水電減低。


廚餘紗線未到量產階段

葛儀文話，廚餘紗線現時未到量產階段，所以未知紗線將來成本，但相信「價錢有競爭力」，而研發中心亦會探討以相似方法，將其他廢物循環再造。


另外兩項金獎發明，分別係從蟹殼提取「蟹殼素」混入紗線製衣，同節水染布技術。葛儀文話，蟹殼素製布一直存在，成品可減少皮膚敏感，亦促進傷口癒合，但因為價錢昂貴，過往多用喺醫療用途，成品亦多數係一小片紗布。葛儀文話，研發中心今次喺生產過程取得突破，降低成本之餘，亦擴大成品至一整件衫，希望將來可將成品應用到其他用途。至於節水染色技術，顧名思義就係慳水，將染布用水大幅減低九成，十分環保。