《明報》報業公會奪15獎 梁﹕維護新聞自由憲制責任

【明報專訊】一年一度嘅香港報業公會「2015年香港最佳新聞獎」頒獎禮噚日舉行，《明報》手足去年奪得15個獎，包括5個冠軍。其中轟動全城嘅「長者遭脫光露天等冲涼」報道，同時奪得「最佳獨家新聞」冠軍和「最佳新聞報道」亞軍。


集團營運總裁﹕我哋好大方

明報上周突然解僱執行總編輯姜國元，引發本報部分副刊專欄作家不滿而「開天窗」，明報喺天窗內加入「編者按」申明裁員立場，再引起爭議。香港報業公會主席、明報集團營運總裁甘煥騰出席活動時回應事件就話「我哋都好大方」，話相信全世界好多報紙都唔會容許「開天窗」。


得獎員工有一憾事

聽講同事今年獲獎嘅心情好複雜，唔少獲獎同事都穿黑衣上台。本報得獎員工之一冼韻姬話，過去一年，同事嘅工作都係喺姜國元帶領下進行，今次最遺憾嘅係拎咗獎返公司，唔可以同姜國元分享喜悅，希望公司可以收回開除姜生的決定。


點都好，記者編輯係報館嘅珍貴資產，明報手足噚日拎咗15個獎，Emily一定要喺呢度恭喜佢哋，相信同事會繼續努力做好新聞，做好第四權角色。


特首梁振英噚日亦有出席頒獎禮，佢致辭時話，新聞自由係香港重要基石，政府會維護新聞自由，不單止因為呢個係政府嘅憲制責任，亦不單止因為呢個係香港嘅核心價值，因為呢個係香港作為國際都市嘅必要條件，同埋維持競爭力、自由開放社會嘅重要基礎。