劉鳴煒只談街舞不談英籍

【明報專訊】協青社旗下嘻哈學校一班導師及學員，月中完成一套有關師徒關係嘅跳舞表演，青年事務委員會主席劉鳴煒亦有參與其中；劉鳴煒噚日接受商台訪問，就話年輕人面對選擇比以前多，容易選擇錯誤，有啲事可遇不可求，好難預先規劃，認為年輕人應謙虛，珍惜學習機會。


劉鳴煒又話，唔少家長喺子女提及興趣同志願時，未仔細聆聽就「say no」，但佢認為每個人發掘自己潛質嘅同時都會有犧牲，認為有時跌跌碰碰學到嘅，可能比喺學校學到嘅仲多。


講完街舞，唔少記者都想聽劉鳴煒回應吓「港獨」問題，包括青年事務委員會點應對港獨抬頭，但佢就拒絕回應，話自己只會回應街舞。記者問早前被揭發有英籍嘅佢，係咪愛國、會唔會放棄英籍時，佢只回應「街舞」二字。