湯文亮：三按財仔 贏就細份 輸就大份

【明報專訊】有對賭博不大認識的人問我，有一次去澳門玩麻將排九，應該輸錢的一次唔使輸，應該贏的一次無得贏，問我點解？我話做莊的人行「地莊」制，賭場或者其他賭客又冇幫莊，假如莊家的金額是10萬元，閒家賭注是20萬，有一副牌，莊家是0點，閒家個個有點，於是，買閒的人排隊收錢，當莊家輸清10萬元之後，就算贏了的閒家亦冇錢收。


反之，莊家有一鋪牌是通殺，閒家亦是排隊輸錢，但莊家贏夠10萬元之後，就唔能夠再贏，以後閒家就不用再輸錢，不少賭徒覺得複雜，不如賭百家樂便算數，簡單快捷，贏就贏，輸就輸，無謂咁婆媽。


借得三按 已近山窮水盡

「地莊」雖然是婆媽一些，但亦算公道，如果大家了解財務公司的按揭運作，便會知道那些做三按或以上的財仔其實是很蠢，他們贏就只得細份，輸就大份。不過，當樓價無止境上升，這個情况是要經過很耐時間才會顯露出來，但當樓價下跌，情况就變得不同，三按財仔可以打定輸數，能夠本利收回的十中無一。


頭按就大多數可以收回本利，不過，頭按的利潤，很大機會是來自三按財仔的本金，所以，我才覺得他們非常愚蠢，但有不少財仔非常熱中做三按，認為本小利大，因為，三按通常收取非常高利息，但是他們不明白，借三按的業主差不多已經到了山窮水盡，無論樓價是否下跌，所借出去的錢都已經很難收回，就好似潑了出去的水。


有經驗財仔多不做三按

大家將會發覺一個奇怪現象，就是有經驗的財務公司多數不會做三按，夠膽做三按的是非常有經驗，知道點樣可以收回本利，那些借了三按的人千祈唔好以為冇咗層樓，問題就已經解決，三按財仔是非常有辦法追數，如果他們沒有辦法，就唔會借錢畀人。


紀惠集團行政總裁

[湯文亮 敢說亮話]