蘇錦樑自彈自唱拉布「錦」言

【明報專訊】新聞行政人員協會前晚舉行30周年晚宴，特首梁振英、前特首曾蔭權、政務司長林鄭月娥、財政司長曾俊華等新舊高官畀面出席。今年無咩環節畀官員同傳媒高層互動，唯一表演節目就由商務及經濟發展局長蘇錦樑帶同ukelele自彈自唱，佢並唔係求其唱首歌咁簡單，而係自己作曲，唱出佢同同事一齊填詞嘅《拉布「錦」言》。


「傷心」無有怕 「蘇太會呵番我」

呢首歌係講番早前受拉布影響要撤回嘅《2014年版權（修訂）條例草案》，歌詞講到「其實版權條例係要過，面對網民反對太坎坷。增加豁免，六大項喎，佢話未夠，睬你都傻」，形容條例通過唔到、前功盡廢「堅傷心」，但佢就無有怕，因為「返屋企，蘇太會呵番我」，中間唔少得聲演立法會點人數嘅「叮噹」聲。


平時彈開結他嘅蘇錦樑，早前喺ViuTV開台禮上見到有人彈ukelele，覺得都幾輕鬆，所以周六朝早先問阿仔借ukulele學彈，由於指法同結他完全唔同，又要記住新歌，所以蘇錦樑話其實都幾緊張！