陳茂波借《悠長假期》講經濟 指失業率敲警號

【明報專訊】今年係經典日劇《悠長假期》播映20周年，發展局長陳茂波都喺網誌借呢套劇講香港經濟轉差，話失業率上升已經敲響警號，社會應該放下成見，為本港經濟尋求突破。


陳茂波話今年頭3個月失業率為3.4%，較上一次數字上升0.1個百分點，係自2013年底後新高，已經敲響警號。佢話《悠長假期》1996年首播時取得成功，正因為佢緊扣當時日本「就業不安」嘅氣氛，故事主人翁亦反映當時日本年輕人面對就業不穩，引起觀眾共鳴。


陳茂波又話，無論係日本抑或香港，經過長時間經濟高速增長後，都需要面對經濟轉型嘅陣痛，搵新增長引擎。佢話基建可以維持社會整體就業，反問討論基建投資時，係咪應該將精力放喺效益和長遠作用，而非籠統將所有基建稱為「大白象工程」，無止境拉布；而旅遊業亦為基層帶來好多就業機會，市民唔應該動輒訴諸中港矛盾，亦唔應該將任何涉及內地嘅經濟協作貶為「討好」、「迎合」內地。