上市透明度高 董事同居也披露

【明報專訊】家上市公司愈來愈講求透明度，但估唔到連「同居」都要披露埋喺招股書，小琴講緊嘅係內房股海藍控股上載初步招股文件，其中寫明主席楊敏正同另一位執行董事周莉同居，關係「儼如配偶」。好多人話怕男人同居得耐就唔想結婚，但招股書無要求董事披露男女朋友關係，而楊生咁誠實，相信係一位好男人。


由於招股書內一般會披露董事年齡，原來雙方年紀亦有若干差距。楊生正值54歲知命之年，而佢紅顏知己周莉就係34歲，剛好相差20年，世間稍為少見。


同居加年齡層不同，一對情侶有齊兩大摩擦位，相信兩位之間感情都好深厚，又或者出乎意料地啱key。不過，港大校委會主席李國章嘅女朋友都比自己細30年，有傳舊年底李國章仲求埋婚，相信年齡差距已經漸漸唔成問題。


[小琴密語]