長毛財會潑墨 要畀4800元 中招陳鑑林 嫌懲處唔夠

【明報專訊】社民連議員梁國雄（長毛）成日帶唔同花款道具示威，不過有時玩得太過火都要付出金錢代價。長毛上個月喺財會審議高鐵追加撥款期間，因不滿「剪布」，突然向主席陳鑑林潑墨水，身邊嘅秘書處職員同保安不幸中招，會議室地氈都留下墨迹。行管會主席曾鈺成噚日就去信長毛，對佢潑墨及拋擲物品行為作出嚴正警告，要求唔可以再做出任何可能導致會議人員受傷和財物受損嘅行為。主席又要求長毛支付清洗及更換被弄污物品費用，合共4800元。


不過長毛就話賠償金額唔多合理，要再搵主席講數。佢話願意畀番立法會同事嘅洗衣費，但清潔工作等本身立法會同事就做得到，自己無責任額外再畀。


長毛笑言下次會發揮創意

至於會否因收到警告而唔再做類似行為？長毛笑言會發揮創意，下次做唔同嘅嘢。其實長毛並非第一次因示威而要自掏腰包，佢2012年就試過，因喺議會內放氣球，被追1萬蚊清潔費。


不過當日被潑中嘅陳鑑林就認為罰款都未夠，對於長毛行為應該有更嚴厲懲處，話報警係可考慮做法。