財爺貼無鬚相談高中

【明報專訊】財政司長曾俊華上星期寫網誌講早前去檳城旅行嘅奇遇，提到自己家庭背景、當年點解要移民等，引起唔少話題，仲有2萬幾個like。財爺噚日網誌就講吓佢去美國讀書嘅事，話佢母校史岱文森高中（Stuyvesant High School）入讀唔易，當年只睇成績收生，同學仔來自五湖四海，但大家機會均等，亦會互相尊重，演繹咗咩係「英雄莫問出處」。


財爺話佢成長嘅經歷都有好多故事值得分享，其中紐約高中生涯喺今日香港回望，係幾有意思嘅對照。佢話自己13歲去美國後住喺曼哈頓下東城，一年後報讀幾有名氣嘅史岱文森高中，估唔到會獲收錄。學校當年按喺高中入學試英、數兩科成績最好嘅學生，喺兩萬多名考生中取錄成績最好嘅700多人，而佢喺紐約讀咗唔夠兩年初中就去考試，獲取錄令唔少老師都詫異。佢話學校客觀條件差，但影響唔到聲譽同成績，因為有唔少好老師，而佢當年亦喺呢度學劍擊，展開佢同劍擊運動嘅半生緣分。


讚紐約母校重視公平競爭

財爺話，紐約同香港都係移民城市，佢讀書時大部分同學都係猶太裔，其他主要係亞裔，但所有人學習、表現自己嘅機會都均等，唔會因為唔同種族、背景受唔同對待，同學亦會互相尊重。佢話學校嘅優良傳統，同香港重視公平競爭、任何人不論背景都有機會發展所長，有好大共通。


財爺喺facebook分享呢篇文，仲上載咗一張未留鬚嘅學生照（圖），半日已獲5000個網民讚好或畀表情回應，當中未見「嬲嬲」。有網民仲留言話佢年輕時樣貌有啲似公民黨楊岳橋。