新地市務總監任輔警一哥 文武皆精曾任港隊射擊隊長

【明報專訊】政府尋日宣布委任新地市務總監楊祖賜做輔警總監，接替退休嘅姚仰龍。楊sir文武都咁得，同時係射擊運動員，係港隊種子射手之一，曾經喺2008年東南亞射擊錦標賽攞過1銀3銅，做過港隊奧運射擊代表隊隊長，家係香港射擊聯合總會嘅秘書長，總會喺2013/14年度封過佢做「頭號射手」，呢位「神槍手」仲曾經為2006年徐步高開槍案做過專家證人。


58歲嘅楊祖賜1989年加入輔警，2010年升為輔警總警司，2013年獲委任為輔警副總監，警方話，楊sir具備多方面行動同管理經驗，仲分別喺2004年同14年獲頒輔警長期服務獎章同第一勳扣。