文化博物館籌備「金庸展廳」 康文署廣徵藏品

【明報專訊】相信唔少讀者都有睇過金庸（查良鏞）嘅武俠小說，由佢筆下創作嘅《射鵰英雄傳》、《神鵰俠侶》、《倚天屠龍記》、《鹿鼎記》等全部都膾炙人口，亦對香港流行文化同世界華文文學影響深遠。為咗向市民展示金庸嘅創作歷程，香港文化博物館將會喺2017年初設立全港首個常設嘅「金庸展廳」。


康文署話，家籌備「金庸展廳」嘅工作如火如荼，為咗豐富展覽內容同館藏，香港文化博物館由噚日開始到9月底舉行徵集行動，邀請公眾捐贈同金庸武俠小說相關嘅物品，徵集範圍廣泛，包括早期由三育、鄺拾記出版嘅金庸武俠小說單行本、連載金庸武俠小說嘅報紙同雜誌、金庸嘅親筆書信、書法同手稿、金庸武俠小說插畫手稿，甚至同金庸武俠小說相關嘅電影同電視劇雜誌、主題曲唱片等。


署方話所徵集嘅物品，將會有機會用嚟做專題報道，同埋喺「金庸展廳」內展出，希望能夠記錄同整理金庸喺香港建立嘅文化事業，如果公眾有興趣捐贈，可以將相關物件嘅照片連同基本資料，透過電郵或信件畀香港文化博物館，詳情可以參考博物館嘅網頁。