3次共處「食白果」 盈盈樂樂造B再失敗

【明報專訊】早前海洋公園暫時關閉熊貓館，希望趁住一年一度嘅繁殖季節，為一樣係10歲大嘅大熊貓盈盈同樂樂製造「有利條件」交配。園方話，今次已經係盈盈樂樂第六個交配季節，今年嘅交配季節已經喺前日告一段落，喺閉館期間，園方觀察到盈盈同樂樂曾經喺3次共處機會時，嘗試自然交配，但3次都「食白果」未能夠成功。


曾做人工授精 最快7月有結果

既然自然交配方法唔得，就唯有再試吓人工授精。園方話，同往年一樣，臥龍中國保護大熊貓研究中心派出獸醫王承東嚟到公園，建議趁交配季節期間，盈盈樂樂除咗自然交配之外，亦利用樂樂嘅新鮮精液同埋四川臥龍另一大熊貓嘅冷藏精液，為盈盈做咗兩次人工授精，希望增加盈盈受孕嘅機會。海洋公園動物及教育部執行總監蔣素珊話，園方會喺之後幾個月密切觀察盈盈嘅身體狀况，如果成功，估計盈盈最快7月會出現懷孕迹象。Emily仲記得舊年底盈盈曾經成功懷孕，但最終「胎死腹中」，胎兒被母體子宮吸收，希望今年盈盈能夠成功造到「熊貓BB」啦！