黃國健換眼鏡 阿涂讚好爭住試戴

【明報專訊】立法會噚日開會，Emily見到工聯會黃國健（KK）以新造型示人，其實佢係換咗副藍色框醒目眼鏡。KK話唔係因為貪靚，而係佢以前戴開全視線鏡片眼鏡，即係一遇強光鏡片會變成墨鏡嗰種；早排佢出席《城市論壇》，結果出鏡時全程好似戴住墨鏡，咁好似唔係幾好，所以先去換眼鏡。


民主黨涂謹申同單仲偕行過見到KK嘅新造型都讚好，即刻問KK副眼鏡買咗幾多錢，KK唔講價錢，講笑話「唔係好貴」，而阿涂就老實唔客氣，問佢借副新眼鏡試戴，仲話要影張相等佢問吓老婆准唔准佢換副新潮眼鏡。


阿涂自己成千度近視，鏡片好厚，佢噚日戴嗰副就真係「唔係好貴」，唔使1000蚊有交易，仲講笑話喺相熟眼鏡舖配眼鏡，可能係眼鏡舖「特事特辦」收平佢！