港首胎人工受孕導盲犬亮相

【明報專訊】香港第一胎人工受孕導盲犬BB噚日剛滿月亮相，包括3隻男、2隻女嘅導盲犬BB，導盲犬服務中心將以A字頭英文命名，寓意Artificial Insemination（人工授精）首次成功應用喺香港導盲犬繁殖上。


今次以人工受孕繁殖幼犬嘅導盲犬爸爸媽媽係黑色拉布拉多犬，分別叫Tovi和Delsie，佢哋接受導盲犬訓練一年後做評估，得分表現各方面良好，故獲選為種犬。佢哋分別來自英國和日本，父母兩代都係導盲犬，血統優良。導盲犬服務中心主席張偉民話，導盲犬經訓練後係咪成材好視乎血統，相信剛出世嘅5頭幼犬能訓練成正式導盲犬嘅機會好高。


張偉民又話，今次成功人工受孕繁殖幼犬意義重大，代表喺香港成立導盲犬精子庫指日可待，話精子庫嘅設立可令導盲犬繁殖更容易協調，亦可以同海外團體交換精子，不論對質同量都有較佳處理。


導盲犬由出世、成長以至接受訓練，至少需要兩年時間同花費約20萬元，中心希望有企業冠名捐助，該企業將獲得一隻導盲幼犬嘅命名權。