鄉議局90周年搞革新 劉業強考慮「村姑選舉」 一人一票

【明報專訊】不經不覺，新界鄉議局今年90周年喇，當然有一系列慶祝活動。Emily噚日撞到主席劉業強，佢都為90周年好上心，推介未來有幾單活動希望大家可以留意一下，包括6月11日會舉行一個大型嘉年華會，10月份就會喺大嶼山梅窩搞沙灘音樂會，以及12月會搞老爺車巡遊活動。


咁樣搞法咪搞足半年？劉業強話今年9月有立法會選舉，相信屆時大家都忙於選舉，所以部分活動留待選舉後先搞。


除咗上述活動，劉業強都未滿足，家佢接老竇劉皇發做咗鄉議局主席，都想搞吓新意思，做啲成績出嚟，一方面會更新鄉議局個官方網頁，亦不排除整facebook專頁，最搞鬼係劉業強聽到傳媒朋友嘅意見下，笑言都可以考慮搞吓新界「村姑選舉」，仲話不如一人一票，提升民主成分