梁耀忠想轉戰超區：自己涂謹申范國威組合較好

【明報專訊】「戰士沒有逃避戰場的權利，這只會讓你的敵人不費吹灰之力取得勝利。」一直反對設超級區議會議席嘅街工梁耀忠，早前話考慮9月由新界西直選轉戰超區，阿忠噚日就正式講明佢轉戰場嘅原因，佢仲提出綜合各項評估，佢自己、民主黨涂謹申及新同盟范國威呢個package較好，因為政治光譜分別包括中產、基層及本土。


稱3人光譜包括中產基層本土

家泛民3席超級區議員由民主黨涂謹申、何俊仁及民協馮檢基擔任，換言之，阿忠嘅講法即係叫民主黨割1席出嚟。不過，據Emily所知，民主黨中人仍然屬意派兩隊出選，周五就會決定人選，好大機會係派涂謹申及乳鴿鄺俊宇。有民主黨人就話，點解佢哋夠票派兩隊但要讓位畀人。


至於阿忠想范國威改選超區，新同盟亦未必同意，因為新同盟都公布咗黨內報名名單，計劃派人選新界東、新界西、九龍東及超區，而范國威報咗留守新東，而超區則有3人報名，包括關永業。


指放棄新西地盤因不服老

阿忠就撰文解釋埋原因，形容自己係放棄較為「穩陣」嘅新西地盤。佢話自己「已經過了耳順之年，但我仍不服老」，話自己「廉頗雖老，仍能飯矣」，仲話如果泛民唔揀稍有知名度嘅候選人，就難取得中間派游離選民支持，對奪取第三議席甚為不利。