國父足跡遊撥款推薦通過 建制區議員：人多就係政治

【明報專訊】噚日本報報道，北區青年協會透過區議會，想向公民教育委員會申請20萬元嘅資助舉辦「探索孫中山足跡」活動，被民主黨林卓廷質疑交流團景點如西湖及娃哈哈工業園，同孫中山無關，無助推廣《基本法》。北區區議會社會服務、勞工及經濟事務委員會噚日加開特別會議，席間有建制派議員要求盡快表決，仲話「人多就係政治」。


北區區議會最終以5票贊成、3票反對、1票棄權，通過推薦北區青年協會呢項計劃。阿廷喺會上多番追問活動細節，佢對未能阻止申請通過感到無奈，「建制派恃住人多，夾硬通過（推薦）一份連他們都認為有疏漏嘅計劃書」。


北區青協：國父同基本法有關

北區青年協會噚日都有代表出席，協會總幹事、活動負責人羌蔓彤不滿民主派議員話活動係「吃喝玩樂、豪華團」，要求佢哋就「失實指控」道歉。青協仲為一國兩制、孫中山之間嘅關係解畫，話基本法喺香港實行，而孫中山在港發起革命，所以兩者有關連。阿廷當然唔收貨啦，「如果兩件事發生在同一地方係理由，實在非常牽強」。