侯志強莫錦貴隔空續駁火

【明報專訊】鄉事派日前上演一場內鬥戲，沙田鄉委會主席莫錦貴等15個鄉委會代表，搞記者會反對以鄉議局名義組黨，但被牽頭組黨嘅上水鄉委會主席侯志強帶同大批鄉民「踩場」。兩個鄉頭噚日透過大氣電波繼續駁火，莫錦貴接受港台節目電話訪問，話侯志強唔係用鄉議局名義組黨就無問題，但被問到支唔支持對方組黨，莫錦貴就話要睇人選，「貿貿然搵個人，對鄉事無益，無可能支持」，又聲言如果組黨「對鄉議局有傷害，就要出聲」。


親身出席節目嘅侯志強原本已離開，都折返直播室，反駁莫錦貴「太多顧慮」，又質問對方係咪有壓力，「撳住侯志強會有加官晉爵？」莫錦貴回應，話鄉議局前主席劉皇發（發叔）當每個人都係朋友，但如果鄉議局同其他黨派成為競爭對手，「再有事咁點算？」

侯志強話發叔醫院揸手撐組黨

侯志強喺節目後暗示自己得到發叔祝福，話自己早前去醫院探發叔，問對方有關組黨嘅意見，佢話發叔當時「講嘢唔方便」，所以叫對方握手示意，支持就握手、反對就放手，結果發叔「連續『噠噠噠』咁揸幾下，無講到嘢，哈哈哈」。呢個情節究竟有幾真，就要看官自行判斷喇。