天雨加大塵 漫畫星光大道公仔烏卒卒

【明報專訊】位於尖沙嘴九龍公園內嘅香港漫畫星光大道展出共30個彩繪雕塑，當中包括本地漫畫家江康泉嘅丁丁企鵝、王司馬嘅牛仔同老竇契爺（圖），以及麥兜等漫畫角色，一直深受市民歡迎，但噚日就有市民發現唔少漫畫公仔身上都滿佈「黑色間條」，有人質疑公仔甩色，Emily就問過香港動漫聯會顧問楊守能，佢就話唔係甩色，而係因為近排天氣潮濕、經常落雨，雨水夾雜灰塵就變成公仔身上嘅黑色線條，抹咗佢就得。


楊守能話，主辦單位原本安排咗每個月清潔兩次，原定今個星期五幫公仔洗白白嘅，但鑑於噚日嘅情况，今日即會派人清潔，市民到時可以見到乾乾淨淨嘅公仔。佢又話，「龍神」公仔身上有鐵角被人踩斷咗，估計因有人爬過上去，已經圍上膠帶，會派人修理，希望大家愛惜公仔，唔好爬上去。