機場清膠達人 確保跑道安全

【明報專訊】一般香港打工仔嘅工作模式都係日出而作、日入而息，不過喺24小時無休嘅香港國際機場，唔少員工就要喺其他人好夢正酣時，開始一日嘅工作。噚日政府新聞網刊登一篇題為「巨翼下的無名英雄」專訪，介紹機管局員工工作，其中一個主角係已經服務機管局16年、每日負責為跑道清膠嘅飛行區助理賴軍。


飛機降落 輪胎摩擦遺膠屑

為咗保持跑道暢順整潔，飛行區助理要清理跑道上嘅輪胎膠屑，事緣飛機降落時喺跑道滑行，輪胎同地面高速摩擦，產生高溫，部分輪胎表層因而熔解，留低膠屑，如果呢啲膠屑積存落嚟，會影響跑道，甚至令飛機「跣胎」。新聞網話，賴軍負責駕駛高壓洗膠車，利用高壓噴水將膠屑打做粉末，然後吸走。除咗清理膠屑，賴軍亦要負責清除跑道雜物，並為跑道標記線重新噴油。


機場跑道愈趨繁忙，可供維修保養嘅時間就愈短。飛行區助理通常喺凌晨1點半開始工作，機管局會先將一條跑道關閉，畀人員入內維修，工作約4個半鐘就完結。雖然工作爭分奪秒，但賴軍話能夠確保跑道安全，已經好滿足。