鄭錦滿籲毁圖書館簡體書 康文署：深表遺憾

【明報專訊】繁簡中文之爭近年成為熱門議題，雖然唔少保留繁體字嘅行動都得到市民支持，但行動若踩界就未必人人接受。熱血公民成員鄭錦滿（四眼哥哥）喺自己facebook專頁，上載一條題為「香港圖書館戰爭 自發將『殘體書』下架抗洗腦」嘅短片，聲稱要教網民「用自己方式」，「銷毁」公共圖書館入面嘅簡體字書籍，不過網民反應相當兩極。


短片所見，鄭錦滿喺旺角圖書館入面呼籲市民「自發行動，遍地開花」，佢將簡體字書丟入垃圾桶，又將部分簡體字書放喺書架同牆中間嘅罅隙，同收埋喺滅火筒櫃。有網民贊成做法，但亦有人覺得言論無罪，如果唔畀人睇簡體書，其實同港府話提出港獨就係犯法無分別。


康文署噚日回覆本報查詢時話，對於有人自行將簡體書下架深表遺憾，呼籲市民愛惜書籍，唔好妨礙其他人享用館藏，以配合市民對資訊、研究同閱讀等嘅需要，又話法例已訂明任何人唔可以故意妨礙其他人使用圖書館設施，而令圖書館藏件遭受任何方式損壞嘅人，亦要承擔法律責任，圖書館職員如果發現有人喺館內作出違規行為，會即時處理。