回應「搞搞震」 葉國謙：公道在人心

【明報專訊】中央政策組首席顧問邵善波早前炮轟建制派唔團結，「40幾人各自搞搞震」，批評佢哋唔「坐定定」開立法會，建制派連日嚟都有人回應反駁，連民建聯葉國謙噚日亦話「公道自在人心」，相信市民會畀「客觀中肯」結論。


葉國謙噚日喺DBC節目度話，建制派團結上一定有改善空間，但大家來自唔同政黨，有唔同睇法、立場及意見係正常，又話立法會連開3日會，「仲有反對派日日時時刻刻點人數，簡單講即係要坐定定喺度，而泛民鬼影都唔見隻」，認為約40名建制議員難以填補35個法定出席人數，直言議員都要接觸市民同處理問題，強調已付出好大努力。「如果要怪（建制派）議員，公道自在人心。」


對於銅鑼灣書店負責人李波事件，葉國謙話，核心問題係有無「跨境執法」，係咪有人綁架、挾持李波到內地，但佢話「人哋點你（返內地）係兩回事，但唔係屬於跨境執法」。對於李波持英國護照，無用回鄉證或特區護照入境內地，法律上點樣認定佢係中國人，葉國謙就話「佢本身就係香港永久居民（主持：唔等於佢係中國人嚟㗎），可以咁講，睇佢自己認乜嘢囉」，又話「可能你自己認英國人，可能英國人唔認你喎」。