小食店「用人幣買二送一」 公關：即日起港幣都得

【明報專訊】淺水灣ClubONE（會所一號）一家小食店貼出告示，用簡體字寫明「使用人民幣購買任何食品及飲品 買二送一」，並註明只找贖港幣。Emily同事噚日喺現場觀察1個鐘，都唔見有人用人民幣付款，店員就話唔知道優惠幾時開始，強調係公司政策。


小食店店員話，如果標價港幣10蚊嘅貨物，顧客用人民幣付款，需要畀10蚊人民幣，唔會按匯率收費，顧客亦可以自由選擇用人民幣或港幣畀錢。店員又話優惠開始至今未收過任何投訴。


ClubONE公關話事件純屬誤會，只係為咗簡化匯率差額、方便運算嘅安排，又話由即日起，市民喺淺水灣小食亭用港幣付款，亦可享用呢項優惠。


港人鄧小姐話，香港人當然係用港幣，唔會用人民幣畀錢，佢又認為站喺公司立場，推出呢個優惠無可厚非，又話嗰度唔止一間小食亭，如果覺得唔公平可以唔幫襯。


來自浙江嘅鍾小姐用20港元買咗一支水同飲料，畀錢時無留意有優惠，又話如果見到告示會用人民幣付款。佢唔覺得優惠對香港人唔公平，認為呢個只係吸引遊客嘅商業手法。