葉劉去福建 處處遇港人

【明報專訊】新民黨主席葉劉淑儀呢幾日帶香港嘅大學生團到福建交流「一帶一路」，唔知係咪同年輕人一齊，年過60歲嘅佢都後生幾歲，精力十足，影相仲相當鬼馬，見到現時流行嘅3D立體畫，都交足戲扮「穿越」歐洲。雖然行程多多，佢都話唔攰，笑言好過坐喺立法會被「拉布」。


5個港人中就有1個祖籍福建，葉太行到唔少景點都偶遇趁長假返嚟祭祖嘅港人，仲爭相同佢打招呼，佢都講笑話「喺呢度都拉到票」。今次係太「海絲會」首個交流團，學生若入會後，100蚊就可以參加呢個5天團。原來背後「金主」係新民黨青委會主席王家揚嘅爸爸，資助逾20萬，作為福建人嘅王家揚都有隨團。


巧遇似「麒麟」神獸

講番葉太，估唔到佢仲有緣撞到「麒麟」！今次行程包括參觀寺廟，廟中有隻神獸裝置，但睇真啲，呢隻神獸雖似「麒麟」，但經醜化後被稱「貪」獸，係古代用嚟警惕為官者要一心為民勿起貪念。聽聞以前唔少官員都要專程嚟寺廟呢個「廉潔牆」裝置前拜一拜，做過高官嘅葉太亦到此一遊影相留念。