1分鐘拉到290米 划艇前隊長鄧家彪唔達標

【明報專訊】啟德郵輪碼頭對開嘅海面噚日好熱鬧，有團體搞咗個觀塘水上運動嘉年華2016活動，有獨木舟、龍舟及賽艇等活動玩，落場划艇嘅包括工聯會立法會議員鄧家彪。阿彪以前係中大划艇隊隊長，但最鋒利嘅刀都有生鏽嘅一日，阿彪噚日著住件划艇隊字樣嘅Tee，喺岸上玩划艇機，1分鐘拉到290米距離，而佢好坦白話以前中大入隊最低要求係拉300米，咁即係未達標喇。不過，阿彪久疏戰陣仍有咁嘅成績都算唔錯。


當年入隊一分鐘最少300米

阿彪噚日都有落艇，玩5人艇出海巡遊一轉，拍檔包括沙田區議員龐愛蘭，而佢哋都平安回航，無跌落海！阿彪話除咗城門河，有機會喺啟德水道划艇都係快事。佢希望政府多喺海濱設置水上運動中心，啟德、將軍澳、東涌、屯門等都係好選址。


噚日風和日麗，確係參與戶外活動嘅好日子。青年民建聯主席、觀塘區議員顏汶羽都去咗趁熱鬧，佢話觀塘避風塘經過政府嘅努力，水質潔淨咗，噚日仲第一次辦水上運動節。佢話支持喺觀塘海濱建立親水文化，等市民有多一個選擇。但佢喺facebook就留言話，「當然，不是食飽飯去啦！」睇嚟，顏汶羽「抽水」多過親水囉！