理大借場播港足戰卡塔爾

【明報專訊】港足舊年10月及11月作客不丹及馬爾代夫，球迷組織「香港力量」都喺理大戶外空間直播兼打氣。噚晚港足作客大戰卡塔爾當然唔例外，香港力量發言人之一Edmund話，由於凌晨開賽，本來擔心喺戶外舉辦睇波活動會有噪音，點知理大仍願意借出場地予球迷，咁就可以盡情打氣嘞。


不過噚晚天氣麻麻，有球迷喺香港力量嘅facebook問，如果落雨有無plan B，Edmund就話無，又話冒雨睇波好平常，咁小事唔會影響球迷撐港足嘅熱情。


佢仲同Emily預告，半場完結時會越洋接通喺卡塔爾嘅球迷兼戰友，直擊當地情况。


雖然Emily至截稿時仍未知港足踢成點，不過根據過去經驗，球迷不時搖旗吶喊，理大現場氣氛肯定高漲。