羅夢熊退休 警隊風笛手送行

【明報專訊】警隊掌管所有刑偵探員嘅刑事及保安處長羅夢熊（前左），噚日開始退休前休假，Emily收到警界朋友嘅短片，警隊內部同事最近幫羅sir搞咗個歡送儀式。片段內，有警察銀樂隊嘅風笛手吹奏住《友誼萬歲》，羅sir跟住風笛手出場，不時同同事握手揮手，然後喺同僚夾道拍手歡送下慢慢步上座駕，徐徐離開灣仔警察總部。


曾剿「賊王」 查陸羽槍擊案

羅sir官階去到高級助理警務處長，僅次於副處長，佢嘅職位由區志光平調出任。羅sir於1980年加入警隊，長期任職CID，亦喺O記（有組織罪案及三合會調查科）工作過，佢曾經率隊圍剿「賊王」季炳雄、調查陸羽茶室槍擊案、馬場爆炸案等，擁有豐富刑事調查經驗。羅sir太太亦係為人熟悉嘅指揮家葉詠詩。Emily聽講，警隊噚晚亦一如傳統設Mess Night晚宴，為羅sir餞行。