惡搞蔣麗芸fb專頁 陳恒鑌「讚好」

【明報專訊】民建聯蔣麗芸（Ann姐）一向都係facebook紅人，無論讚佢或彈佢嘅post都唔少，仲有人設立咗一個惡搞佢嘅「蔣麗芸議員，我建議呢你考慮少啲講冇乜用既說話」專頁，介紹Ann姐動態，但估唔到Ann姐嘅黨友陳恒鑌（Ben）都like咗呢個專頁，點解阿Ben咁夠膽？不過，Ann姐對阿Ben咁做一笑置之，但就建議大家，除咗睇惡搞佢嘅page，叫阿Ben同大家最好逢係Ann姐專頁出嘅post都讚好，咁就有一個更全面嘅看法喎！

稱要了解外面人睇法

阿Ben就同Emily講，佢哋都需要了解外面人嘅睇法，唔出奇。除咗呢個專頁，佢話同事平時都會同佢like唔同專頁，聽吓出面人嘅睇法，好似like「本土民主前線」fb咁，「唔通又代表支持佢哋咩？」呢個惡搞專頁名，係來自立法會主席曾鈺成喺立法會大會上嘅說話，專頁有600幾人like，簡介寫有「本專頁全力追蹤蔣家大小姐在立法會飽受凌辱的慘況」，最後更新係上年7月。