接受曾鈺成訪問 唐唐：相信內地會進步 慢慢步向法治

【明報專訊】立法會主席曾鈺成一直話搞智庫，但只聞樓梯響，噚日終於見到曾主席以香港願景計劃召集人身分，訪問政協常委唐英年。訪問片段中，曾主席都問唐唐明年仲選唔選特首，而唐唐重申一次唔會再玩，仲講笑話，「我覺得下一套戲無上一套咁好睇，因為上一套真係好熱鬧」，唐唐仲話上一屆花生都賣到斷晒市！對於下屆特首，唐唐就祝願下一個行政長官能夠做到政通人和，謙虛地做好工作。


料2022普選特首機會微

講完笑，二人講到下屆政府會唔會重啟政改，但佢哋都顯得好神傷，唐唐仲話覺得2022普選特首機會相當微。佢希望好快重新啟動政改，「但上一次給了一個這樣的套餐，下一次人大常委給你同樣套餐，你食唔食呢，你班泛民食唔食？人大常委會說我上一次給了機會，你們否決了，你們是否應先搞好經濟民生，普選再留下次才做」，唐唐所以話上一次非常痛心，機會錯失咗好可惜。


曾鈺成：明白年輕人重視核心價值

近期有本土派話要討論2047年之後香港應該行乜嘢制度，曾主席就話明白所謂本土派年輕人，覺得香港嘅核心價值好重要，怕內地一套會引來香港。


指傾30年後會點係咪太早

唐唐反而話，家傾30年後點樣，係咪早咗啲呢？佢話香港一套自由、法治及人權，每一個人都要守護，係一國兩制完整性，但暫時睇唔到香港會失去呢啲價值。佢反而向前看，相信內地會進步，慢慢步向法治，所以唔好用以往嘅目光，或影張相咁，覺得內地唔會變。佢話香港只要守護呢套價值觀，內地漸漸都會向呢套價值觀行。