落選議員獲選東區增委 趙家賢唔順氣

【明報專訊】新一屆區議會去年11月塵埃落定，但係東區太古城西當選嘅趙家賢近日就好唔順氣，原來佢嘅對手吳志隆，最近獲建制派推薦及支持，獲選入區會轄下嘅地區設施管理委員會做增選委員，噚日開會仲坐正趙家賢對面。趙家賢話，對手參選時標榜獨立，但其後區會搵增選委員，工聯會議員就提名吳志隆，而民建聯就和議，結果區議會以文件傳閱方式表決，以17對7票通過委任。趙家賢於是形容對手係「SuperTony」，Tony係吳志隆嘅英文名。


Emily噚日聯絡Tony未獲回覆，而趙家賢就話以往都試過有落選者再獲委任，而東區區議會由建制派佔多數，所以增選委員通常都係建制派玩晒。趙家賢曾提出，今次選舉應該做記名投票，但唔知點解選舉時用咗不記名投票，所以噚日開地區設施管理委員會，佢都有提出質疑。其實趙家賢又唔使咁勞氣，增選委員雖然可以喺委員會上發言、提問及投票，但無區議員薪金，待遇有啲唔同。


喺去年區選，趙家賢攞到3362票，吳志隆就有1268票。