曾被港府剷走 大師塗鴉現Art Central

【明報專訊】近年唔少國際藝術展空降香港，第二屆中心藝術博覽會（Art Central），今年再臨中環海濱。Emily噚日喺傳媒預覽會上發現法國藝術家「Space Invaders」嘅真迹，佢前年喺香港街頭創作馬賽克塗鴉，事後被政府部門剷走咗。至於噚日展覽嘅就包括近1米高嘅「傻豹」，亦有同街名牌大小相若嘅「食鬼」馬賽克。


場內另外有唔少藝術品都好吸引，其中一個名為「男孩頭像Bust of a Boy」嘅作品，不論遠睇近睇都只係個頭像雕塑，不過當工作人員將雕塑頭部拉高，原來頭像可伸展。來自內地嘅藝術家李洪波話，佢用咗接近7000張紙製作，疊起啲紙後先開始雕刻。咁點解會有呢個意念？佢就話學咗畫畫超過30年，一直思考點樣突破，後來試用紙做媒介創作，令創作更多元化。


今年Art Central雲集21個國家或地區嘅藝術品，大會話今屆主打新媒體藝術。展覽由3月23至26日對公眾開放，市民有興趣可買飛欣賞，每張正價成人票230蚊。