有話說﹕功課太多 教小朋友罷做對嗎？

【明報專訊】Mama都係千禧世代嘅家長，都好明白新生代嘅小朋友係學業上嘅壓力，家長見到小朋友讀到辛苦，自己又心痛！好似前排有媽媽喺社交群組發文，話佢讀K2嘅囡囡要做好多功課，當中抄寫內容太多，搞到囡囡主動話手仔好攰，於是媽媽就代囡囡出手，唔係幫佢做喎，而係幫佢寫咗幾隻字畀老師，內容大概話係功課太多，然後叫囡囡唔好再做。


記得Mama細個時，個個同學都好驚老師，老師叫做，我哋又點敢唔聽，莫講話一定會乖乖做晒功課，連唔記得帶功課返學校都會驚到喊。到家下做咗媽媽，有時見到阿仔喊住口話唔想寫字，Mama就會教佢一啲得意嘅抄寫方法，例如唔使順住功課簿啲格一行行寫，反而試下打斜寫、由下向上寫，甚至好似畫個公仔咁跳格寫，當然，最後要填返未寫嗰啲窿窿。


你或者笑Mama教阿仔自己呃自己，但若果覺得功課多，罷做又係咪一個最適合嘅方法呢？Mama同香港教育學院幼兒教育學系副教授鄭佩華傾過，佢話首先唔係間間幼稚園都有咁多功課，不過當遇到呢種情况時，最重要係家校雙方好好溝通，因為亦有老師認為如果功課太少，有時家長可能覺得唔妥，怕將來小朋友考唔到好嘅小學；加上每個小朋友能力唔同，有人認為功課多嘅同時，或者有人認為啱啱好。


或誤會老師唔啱聽就可以唔做

「如果只叫小朋友罷做，喺佢哋呢個年紀未必明白背後原因，咁只會畀咗一個錯誤信息佢哋，認為只要覺得老師講得唔啱聽，就可以唔做，咁未必係最好嘅處理方法。不如同小朋友一齊搵老師傾，將負責表達嘅責任交返畀小朋友，但係家長都要陪住佢、支持佢，睇吓老師會提出咩解決方法。」另一方面，鄭佩華話老師亦要考慮到重複抄寫係咪真係能夠達到某啲學習意義，建議佢哋不妨諗多啲唔同嘅功課模式來提高小朋友語文能力，如閱讀、分享等一樣有效果，抄寫並唔係唯一出路啊！