練馬師葉楚航角逐打吡 盼為華人爭光

【明報專訊】本地馬壇盛事寶馬香港打吡大賽星期日（20日）喺沙田馬場舉行，本地冠軍練馬師葉楚航會帶領「小米周」參加比賽，若果勝出，就係繼2001年簡炳墀後15年嚟首個勝出打吡嘅華人練馬師。


師傅簡炳墀15年前勝出

簡炳墀係葉楚航嘅師傅，曾經五奪香港打吡大賽桂冠，對上一次係2001年，自此之後再無華人練馬師攞到呢項殊榮。航哥當咗14年練馬師，今次係第4次參加打吡，佢話以往3次馬嘅實力一般，又抽咗大外檔，所以成績麻麻，今次抽到第一檔，可以慳返好多腳程，利用檔位優勢，希望有好成績，為華人爭光。


抽到第一檔 有檔位優勢

至於「小米周」過去喺香港最多參加過三班賽，而打吡係一級賽，所以今次屬於越級挑戰，航哥話「小米周」喺14匹馬之中評分最低，但擅長跑千六米，加上近期狀態大勇，所以好有信心。


每隻馬只可參賽一次

打吡大賽全程2000米，總獎金1800萬，只限4歲馬參加，每隻馬一生只能參加一次，亦係唔少馬主、騎師同練馬師夢寐以求嘅榮譽。