黃國健話棠哥嫻姐更年期症候群

【明報專訊】工聯會郭偉強上個月底榮升爸爸，做咗幾個星期新手老竇，無請陪月員或工人，佢噚日現身立法會時仍好精神，仲帶埋薑醋派畀記者食（圖），不過唔係郭偉強自己煲喇，而係去出名薑醋好食嘅中華總商會會所買。佢話至今仲未同囝囝改名，佢黨友就透露，曾提出去探BB，但郭偉強就以屋企細為由婉拒咗。


郭偉強添丁派薑醋

另一邊廂，工聯會幾個元老近期就幾躁底，話說工聯會榮譽會長陳婉嫻早前狠批特首梁振英剛愎自用，但另一榮譽會長鄭耀棠就話嫻姐唔代表工聯會，而工聯會前立法會議員梁富華及後仲發聲明「歡迎」棠哥鬧嫻姐。元老互片，工聯會立法會議員黃國健（KK）又點睇？KK一副食花生態度咁話，三位元老都係「更年期症候群發作」，話佢哋不時都係咁耍花槍，唔需要去調停嘅，加入戰團反而仲危險。佢仲笑笑口咁話，其實佢哋都應該搵工聯會潘佩璆睇吓。人稱潘醫生嘅潘佩璆，本身係精神科醫生。