彭耀佳：財爺管稅安全精明

【明報專訊】財政司長曾俊華噚日喺會展出席商界午餐會，推銷自己份財政預算案點樣為商界開拓商機。財爺致辭時幽自己一默，話呢份已經係自己發表嘅第九份預算案，雖然相信「工多藝熟」，不過從報章評論同自己收到嘅回應，就知道自己仍然要多多練習，又笑言有人講過預算案封面嘅顏色（紅色），已經係預算案最明顯嘅轉變。


聽到財爺咁謙虛，主持問答環節嘅香港總商會主席彭耀佳，就向財爺「笠高帽」，話自己諗唔到有咩方法，比將稅收交託財爺更安全同精明。彭主席早前接受傳媒訪問時，未有表態支唔支持特首梁振英連任，今次咁大頂高帽笠落財爺度，唔知係咪想為下年特首選舉落定些少注碼呢？