醫學會換屆 史泰祖表明唔選

【明報專訊】醫學會來屆選舉會喺今年6月接受提名，現任會長史泰祖噚日喺傳媒春茗宣布來屆唔再參選，想選嘅人要早出聲。史泰祖當選後曾因政改民調一事同前會長蔡堅意見相左，鬧得唔太愉快，但最終都「握手」言和。史泰祖一話唔選，一眾行家焦點自然放喺同場嘅蔡堅身上，蔡堅亦都話有意選。


副會長陳以誠就話，以目前政治環境，「無諗住家去內耗」，一定要集中火力去團結做事，最重要係醫委會改革一事，如果蔡堅選會長，佢就唔會選？陳以誠話可以咁講，至於仲選唔選副會長，佢就未決定。另一副會長周伯展話暫未有意選會長，但「never say never」。


今年選舉多，立法會醫學界議席亦係兵家必爭之地，史泰祖就叫記者行家「唔好問我（選唔選）」，仲話唔會家講支持邊個，但覺得年輕醫生聲音愈來愈大，都傾向「畀新人做」。


至於醫學會近排因要求《醫生註冊條例》修訂草案維持委任同直選委員1：1比例一事，四出向議員拉票，蔡堅話暫未夠票，要繼續努力，下月會約見梁國雄，仲講笑話自己最鍾意長毛，「次次都投佢」。