抽房署議辦 民主黨新丁被4民建聯議員「圍攻」

【明報專訊】新一任區議員話咁快已上任近3個月，但北區天平東區議員、民主黨新丁劉其烽同Emily訴苦，話至今仍未搵到辦事處。原來天平東議員租開嘅議辦，房署話暫時有5個北區區議員提出申請，將抽籤決定花落誰家。據了解，其餘4人都係民建聯區議員。阿烽對於被「圍攻」感無奈。


暫租40呎倉 4對手已有議辦

根據房署分配議辦機制，會優先分配畀當區區議員，之後就到屬同一區議會嘅「跨區」區議員。今次眾人都係跨區申請，各有五分之一機會抽中。劉其烽所屬嘅天平東選區，過往3屆議員都用天平邨天賀樓（屬天平西選區內）房署單位做議辦。佢暫時向天平邨法團租用約40呎貨倉作臨時辦事處，諷刺嘅係該貨倉正喺空置嘅議辦旁邊。


據了解，除咗阿烽，其餘4個申請人都係已經有議辦嘅民建聯議員。其中聯和墟選區曾興隆同立法會議員陳克勤合租當區一個100呎私人單位，雖然聯和墟同天平邨有一段距離，但曾興隆嘆現處租金昂貴並唔理想，「都係博吓彩數，抽到先算」。


另一申請人、皇后山選區鄧根年都話「抽到先算」，仲透露「3位民建聯同事都有抽，希望有更多地方服務市民」。鳳翠區廖興洪嘅助理就同Emily講曾遞交申請，不過家搵到議辦就無計劃再申請過。沙打區嘅溫和輝就話，因為現有辦事處喺沙頭角禁區，對無禁區紙嘅選民唔方便，一直想搵多個區外辦事處服務選民，「我嘅需要一定比其他人高！」


阿烽話好無奈，「其他人都已經有議辦，抽籤決定實在不公平」，現時只有五分之一機會抽到。雖然佢唔認同對方做法，但正考慮情商都係民主黨嘅林卓廷加入申請，提高「中獎」機會。