不愛《我至叻》 財爺愛《喜氣洋洋》超越二次創作

【明報專訊】電視業界今年風起雲湧，噚日商台邀請咗業界代表出席《在晴朗的一天搶收視》電視擂台，財政司長曾俊華擔任主禮嘉賓。論壇大談電視發展，公務繁忙嘅財爺又有無時間睇電視？原來財爺每朝6至6點半都會睇新聞，有時間仲睇吓英超、NBA。商台首席智囊陳志雲就追問到底係邊個新聞台，財爺就只肯答「有新聞嗰個台」，惹得全場大笑。


論壇開場前，組合C AllStar演唱財爺喺今年財政預算用嚟結尾嘅《憑著愛》，志雲大師見財爺平時鍾意憑歌寄意，叫佢用一首歌鼓勵業界。財爺就自爆有同事提議佢用陳百祥首《我至叻》，但佢覺得「麻麻地」，佢就偏愛唔少網民鍾情嘅小鳳姐首本名曲《喜氣洋洋》，講笑話首歌已經畀人二次創作到第七八次，夠晒創意喎。