萬事達新信用卡 內置顯示屏做驗證

【明報專訊】網上購物愈嚟愈方便，但係小琴成日好驚，用信用卡畀錢會唔會有安全問題。原來萬事達卡（MasterCard）喺台灣出咗張技術創新嘅信用卡，有內置小屏幕。一按卡上嘅按鈕，右上方嘅小屏幕就會彈出6位數字嘅一次過密碼，等卡主網上消費嘅時候，有雙重認證，多一層保障。而且，當卡主要做「非指定帳戶轉帳」嘅時候，唔使再等手機短訊驗證，就可以完成交易。

呢張全球首張內置顯示屏嘅信用卡，由萬事達卡同台灣永豐銀行一齊推出。不過，原來今年6月，萬事達卡已經同法國巴黎銀行合作，喺法巴旗下嘅土耳其TEB銀行引入呢項技術，推出全球首張有內置顯示屏嘅借記卡。小琴就諗，呢種咁嶄新嘅技術，唔知幾時會引入香港呢？