有話說﹕父母才是「繫鈴人」

【明報專訊】近日學生輕生個案接二連三發生，真係睇到Happy Mama唔多Happy。雖然Mama唔想再講太多唔開心嘅嘢，但係某日睇到有專家提到要解決孩子的問題，父母其實才是真正的「繫鈴人」，Mama忽然茅塞頓開。


好多人都話，父母係最容易影響小朋友嘅人，如果爸媽係樂天派，仔女多數都係開心果；相反，如果爸媽事事緊張杞人憂天，仔女都較容易成日驚驚青青。既然小朋友返學已經要面對功課同成績壓力，我哋做父母除咗唔好再將學業壓力加諸仔女身上，應該仲有好多方法可以令小朋友覺得生活係充滿美好嘅。


另類媽媽 帶囡行山

Mama認識一位自小熱愛行山嘅朋友Betty，佢同來自意大利嘅老公結婚後喺香港開餐廳，家有一個6歲囡囡Emma。呢兩母女嘅與別不同，就係佢哋嘅足迹幾乎遍及香港大部分高山低谷，任何山澗、石林都完全難唔到佢哋，閒來喺facebook開設專頁講行山之樂，受到唔少另類家長歡迎。


點解係另類？大家都知香港學童時間寶貴過企業家，放學要補習，星期六日仲要學呢樣學嗰樣，要花兩三個鐘去大自然放空？No Way！但係讀K3嘅Emma，竟然每星期可以有一至三日跟媽媽行古村、去礦場，接觸真正嘅大自然，對普通學生嚟講，呢啲活動真係好「奢侈」。


接觸大自然 欣賞生命

Betty選擇同囡囡行山嘅原因好簡單，就係覺得香港變得太快，好想同囡囡睇多香港大自然幾眼。但係行山其實令小朋友有唔少收穫，例如沿路見到一草一木或者昆蟲，都可以令佢哋學到欣賞生命；有一次，Emma更忽然同媽媽講﹕「嗰條路唔行得，咪行呢條路囉！」Betty話呢句其實就係佢自己嘅口頭禪，佢相信人人都有唔開心嘅時候，重點係識得點樣調校自己心態。Betty相信家庭教育往往比學校教育更重要，所以Mama都話，仔女開唔開心，父母絕對係關鍵人物，希望大家以後識做啦。