劉鳴煒唔識簡體字 自詡普通話準過唔少港人

【明報專訊】青年事務委員會主席劉鳴煒頻頻同年輕人交流，對社會上教育議題都略知一二，Emily日前訪問佢，都有問吓佢對普通話教中文，以及教育局課程諮詢提出學習簡體字嘅議題，而劉鳴煒斬釘截鐵話「我唔識簡體字」，但就自認普通話發音比唔少港人準確喎。


讀書時學校禁講廣東話

鳴煒話，佢細個時讀國際學校，校方當年只准學生講英文或普通話，如果講廣東話會被罰留堂，佢話今時今日講本土，呢啲校規會被人鬧死。不過，就係因為咁，佢就練習到普通話，發音比較準，話畢生受用。但對於支唔支持普教中，佢就話先決條件係評估學習成效，如果廣東話先教得好成效，咁就唔應該妥協。同樣道理，係咪要學生學簡體字，先決條件係唔會影響到學生學好繁體字及學習進度。