嫌北京口味太重 陳智思自備乾糧

【明報專訊】喺北京嘅兩會仲有幾日就完結，港區人大代表開咗成個星期會，今日終於可以放假一日休息吓。人代劉佩瓊會帶隊，同幾個人代包括自由黨劉健儀，一齊坐高鐵去天津一日遊，參觀下梁啟超故居等當地景點。


唔少政協同人代都呻今年兩會會期，比去年長幾日，話有同中央建議希望可以縮短會期。


北京嘅膳食都係北方口味為主，香港人都未必食得慣，有人代都話北京食物太油膩。好似劉健儀咁，佢話有時食飯時見到太多油嘅青菜，都會用熱水過一過先食。


身兼「降低食物中鹽和糖委員會」主席嘅陳智思，因為身體問題要食好清淡嘅食物。陳智思前晚喺北京同傳媒食晚飯，就透露自己帶咗好多乾糧，包括兩大樽腰果同麵包上京。他都呻上到北京好難搵清淡嘅食物，笑住話平日喺北京食飯，都係食炒蛋同青菜，因為最安全。不過，嗜辣嘅陳智思，無論點都會隨身帶住自家辣椒調味。


雖然陳智思食飯清淡，但食飯叫餸，就為大家叫好多重口味食物，例如水煮魚同填鴨。