湯文亮﹕廿一點「必贏」方法

【明報專訊】在上星期六，我去了澳門飲春茗，與一班舊同學相聚，有人話我就威，寫了爆煲論，仲話香港人唔知道爆煲論是必勝之術，如果樓市爆煲，當然可以講預測準確，如果唔爆，又可以講話因為是爆煲論令到市民關心樓價，所以沒有爆煲。其實，避免爆煲，是賭廿一點必勝之術，唔好講香港人，就算澳門人都唔識。


廿一點最初在澳門推出時，絕大部分賭徒都不明白，究竟賭場怎樣維生，因為廿一點唔抽水，但又很奇怪，大多數賭徒都輸到焦頭爛額，這點，令他們更加不明白。不過，亦有人長期在廿一點賭枱贏錢，賭場話那些人是職業賭徒，從已出的牌計算值博率，於是，賭場將廿一點啤牌由一副加到三副，再加到五副，現在是六副，令到賭廿一點的賭徒很難計數。


避免爆煲 嚴守注碼

其實，毋需要計數，廿一點必勝之術就是避免爆煲，因為如果閒爆莊又爆，並不是和局，是閒輸，等同抽水。所以，玩廿一點，閒家只要超過十二點，就一定不要再要牌，唔要牌就唔會爆煲，而規則上，莊家在十六點或以下都要繼續博牌，如果不是賭場，私人做莊是做唔過。還有一條規則要遵守，就是注碼是統一的，不能夠有時買得多，有時買得少，這條方程式，大家當故事聽下就算唔好太認真。


在我發表了「細價樓爆煲論」之後，有人同我講，就算爆煲又如何，樓價始終會上升。我非常同意，但如果買樓之後樓市爆煲，樓價下跌，即是畀別人抽水，如果因為恐怕樓價會繼續下跌而將物業賣走，就肯定是輸家，如果唔賣走，可能輸多更多，就算以後樓市回升而最後都不用輸，都賺少很多。唔信？問去年買了樓的人就最清楚。


紀惠集團行政總裁

[湯文亮 敢說亮話]