方剛上京見港澳辦 田少怕揣測唔去

【明報專訊】兩會期間唔少人代、政協都會齊集京城一齊收吓風，見吓京官呀咁，自由黨亦唔例外，自由黨黨魁方剛（圖）更加特登飛上北京，同周梁淑怡、胡漢清、李子良等一眾本身要開兩會嘅黨友，一齊見吓朋友，而呢啲朋友包括港澳辦官員，如副主任王志民、馮巍等。


方剛同Emily講，今次上嚟都希望幫吓啲黨友，同中央官員講吓佢哋提出嘅提案，包括一地兩檢同假難民等議題，例如喺假難民問題上，就建議如遇有假難民，特區政府就應「即捕即解」。


早兩年被中央褫奪全國政協委員身分嘅自由黨田北俊，今次就無上北京，方剛話原本呢段時間田少應該與阿女同孫去新加坡，但臨時畀個女飛甩咗，田少一度有諗係咪都上嚟北京，但考慮到如果佢現身北京，喺呢度被大家發現會覺得好敏感，引來更多揣測，所以最終都無出現。