民主思路開實驗室收集民意

【明報專訊】立法會選舉仲有半年先舉行，不過各路政黨團體已經摩拳擦掌做好準備。由湯家驊（Ronny）牽頭嘅智庫民主思路，噚日宣布喺北角同馬鞍山成立兩個「政策實驗室」，收集民間對不同政策嘅意見。雖然Ronny噚日話民主思路係咪出選立會言之尚早，又強調「實驗室」同普通政黨辦事處嘅性質唔同，但就重申走入議會一直係民主思路嘅其中一個目標。唔知Ronny今次搞「實驗室」，係咪同時想增加樁腳，或者測試民間支持度呢？


據Emily了解，兩個「實驗室主任」、即係民主思路聯席召集人劉培榮同理事黃梓謙，都考慮緊選唔選立會。不過Emily問番兩名當事人，佢哋都異口同聲耍太極，話仲有好多因素要諗，無承認嘅同時，亦都無否認。


召集人同理事考慮選立會否

上月底立會新界東補選，本土民主前線梁天琦以6萬幾票高票落選，但聲言行第三路線嘅新思維黃成智，就只得萬幾票。作為前新界東議員，Ronny覺得今次補選議題狹窄，相信唔會決定到9月選舉嘅結果，但就相信每個香港人都希望有更多選擇。至於會唔會同新思維喺選舉合作，Ronny就話都係言之尚早。